* الدقيقة لو راحت مش حترجع .. ليه بقى للحزن نفضل نرجع .. ادى شمس جديدة جايلنا يوماتى .. الشمس بس لو راحت بترجع... **** توعدنى لو الدنيا توهتنى تحضنى وترسينى .. توعدنى لو الايام بعدتنى ترجعنى وتتدفينى .. توعدنى لو الشتا غرقنى فى احزانه .. يلاقيك انت واقف يا حبيبى قدامه .. توعدنى تفضل حبيبى توعدنى انك تحمينى .. ووعد عليا تفضل حبيب حعيش علشانه **** عجبى علينا لما نجرح نفسنا بايدينا .. ونقول ان الجرح جالنا من الدنيا .. كل مرة بننجرح الجرح بيعلم فينا .. واللى بيشيله عننا انتى يا دنيا **** أنا خايفة وخوفى جديد عليا .. معقوله نتقابل بعد السنين ديا .. اوعى يا زمن تعملها فيا .. انا نسيته وخلاص حياتى ماشية . ليه بترجعه دلوقتى تانى ليا **** حيجرى ايه لما اعيش وحيدة حيجرى ايه .. ما انا عشت بقلبى وحبيت اخرتها ايه .. مش عارفه ليه بلاقى نفسى فى الحرية .. اقل ما فيها محدش بيعاند دايما فيا.. .. ودايما مش راضى بحاجة دايما معترض عليا ..الحب عمره ما كان سجن وليه اتسجن.. حب الزمن دة خلاص ميلزمنيش مليان أنانية **** بتلعب لعبة منتش ادها بتلعب لعبة كبيرة عليك .. .والحق عليها بجد عشان ذنبها انها واثقة فيك ..معقول يعنى واحدة تحبها تجرحها يا ابنى بايديك .. فكر تانى وارجع لعقلك.. قلبها ذنبه انه ندهلك ..متخسرهاش وبدل ما تلعب بيها حطها فى عينيك **** عروسة حلوة وبيت وزفة وعيلة ... وحاجات جاية يارب تبقى جميلة .. وشغلانه حلال وراحة بال ورضا بالحال .. .. وضمير مرتاح وارض براح ودموع افراح .. حاجات كلها بحلم بيها من زمان .. الدنيا زحمة مليش فيها مكان ... نفسى الاقى نفسى واعيش فى امان .. يجرى ايه لو أبقى بيه ..ليه يا دنيا عليا بايه .. ..أعيش على طول فيكى تعبان **** بينى وبين نفسى بجيب فى سيرته ...بعترف لنفسى بس بقولها انا خسرته..مع ان انا اللى بعدت وسبته .. قلبى مش مطاوعنى ونفسى افضل حبيبته **** فى وشوش الناس حتلاقى الضحكة فى مليون وش .. وفى نفس الوقت تلاقى ناس عايشة حياتها تغش ..وما بين الزيف والاصلى ناس عايشة بمليون وش..وان عشت حقيقتك بينهم حتخاف من الناس وتكش... **** وقت الجرح عادية ..بتحمل جرح وميا .. .. وشبعت جراح اتارينى.. قلبى مليان حنية .. بس اللى تعبنى حقيقى .. مبقاش فى غالى عليا ..وبشك فى كل صوابعى..الشك صبح من طبعى ..وبخاف من الدنيا ديهيا **** يا اللى عشانه سمعت كتير فى كلام .. ياللى عشانه اتحلمت وعشت كتير ما بنام.. .. جاى دلوقتى تقول حتسبنى جاى تقولى سلام .. طيب ماشى موافقة وماله انا حنسى الاحلام .. واياك ترجع تانى فى يوم وتقول انا ندمان **** بفضل فى مكانى .. لما بسمع خطوتك .. .. وان لمحت طيفك .. بشوف معاه ضحكتك .... بعيد ولا قريب .. حيفضل القلب قريب .. غصب عن عينى .. متشعلقه بيك عينى.. من لحظة مشفتك **** مين عاقل يغلط الغلطة مرتين .. مين دة اللى غاوى مين .. يخلى حزنه فى الدنيا حزنين .. .. مين اللى فرحته بتفوت عليه .. ويقولها تعالى يا فرحة بعدين .. تقصد اعملها واحبك تانى واعشقك ..انا غيرك مقدرش احب اتنين **** لسة بتقول عندك أمل فيا .. لسة فاكر انى بحبك وليا.. لسة فاكر انى قلبى فاضى .. متملاش منك ومن جراحك قسية .. انت غلطة وغلطتى حدفع تمنها .. وقلبى اتحكم فى مشاعرى ودفنها.. وبطلت خلاص اتعامل بالحب والحنية **** افتكرنى لما تشوف الدنيا فى عينيك مش دنيا .. افتكرنى لما تحس انى قدامك فى كل ثانية .. أصل انا عارفه انك حتلاقينى معاك مش حفارقك.. صورتى قصاد عينيك وصوتى كمان صدقنى مش حيفارقك .. حتسمعنى وانا بقول بحبك حتسمعها من غربك وشرقك **** عيونك مدينة.. تاخدنى بعيد .. وأبحر لمينا.. وحبى يزيد.. ..تكحل عنيا.. بسواد الليالى.. وتشرق فى شمسي.. ومع كل غالى .. ..ومهما حيحصل.. ومهما حشوف .. حتفضل فى قلبى .. حتفضل فى بالى..وأضلل عليك ..والمس ايديك .. واخدك فى حضنى .. واغطيك بشاالى **** مين فينا محظوظ بالتانى مين فينا اللى الدنيا بتحبه .. مين فينا اللى حب فى ثوانى حب من قلبه .. .. انت ولا انا مهياش فارقة خلاص ما حبينا .. المهم بقى يا حبيبى اللى جاى مين حيكمل فينا .. **** اوصفولى الحب فى كلام .. عايز اعرف كل معانيه.. ياريت تعرفونى معنى الغرام ..اللى عايشين ندور عليه..وان وصفتم الحب امانه.. توصفوه بكل ما فيه .. شفت انا فى الحب .. ناس بتشتكى دايما منه .. وناس تانية بتشكر فيه.. اوصفوا الحب فى كلمات .. ومحدش يقولى انه مات .. اصل كل اللى عرفته .. ان الحب مفهوش خد.. الحب بقى كله هات **** أنا خلاص استكفيت من عمايلك استكفيت من وعودك ..أنا حتى لو قلبى طايلك مش بتحمل ردودك.. وكلامك بقى كله قاسى عليا ..نفسى اعرف ازاى تجرح فيا .. .. وكتير اوى كنت بسكت رغم انك اتعديت حدودك **** أمانه يوم ما أجيلك فى بالك متنكرنيش .. متهربش منى فى خيالك وافتكر ايامنا متكرهنيش . وان سألوك عنى متكدبش عليهم وتقول محبتنيش .. ..حتى وانت بعيد عنى حطلب منك متجرحنيش **** ونسينا خصامنا .. ونسينا زعلنا .. وصفيت قلوبنا .. ومهنش وداعنا .. كنت نايمة .. كنت بحلم .. بس للحقيقة .. بسرعه رجعنا **** زعلانه على الايام اللى ضاعت وانا فيها بحلم ببكرة.. كان لما يجى عليا يوم جديد ابتدى افكر لبكرة .. كنت ببقى فرحانه ان لسة عايشة معاك لحد بكرة **** اللى يعيش .. يراضى فى الكبير .. ويراضى فى الصغير ... .. يلاقى نفسه .. فى الاخر مفيش.. أى حاجة بتتغير .. كل واحد .. بيقول يالا نفسى .. كل واحد معندوش .. أى استعداد يتغير **** كل حاجة مسموحالك .. كل حاجة تبقى ليك .. حتى السكة مفتوحالك ..ومفيش اى عيب عليك...أنا مبقتش مرتاحالك .. كلمة حق بقولها ليك.. امتى تبقى راضى .. ليه عايش كدة .. عايش بقلب فاضى .. مش حاسس باللى فيك **** يا خسارة ..حتى الخسارة .. دى خسارة فيه .. لعبها صح .. لعبها بشاطرة .. ده العيب عليا .. مش عليه **** أنا مش شكل وبس .. انا انسانة زيك وبحس .. بزعل واغضب زى الناس .. افهم معنى كلامى وحس.. أنا زيك عندى مشاعر ..احسن منك أصلى براعى .. .. احساس غيرى عشان بيحس **** انت اللى وقت الفرحة بفرح معاه .. واللى وقت الحزن بقول قبله الاه .. وانت بس اللى تشوف دمع عيونى ..ودمع عنيك قبل ما ينزل شيفاه **** أنا بعرف اتغر .. لو نفسك مرة .. تشوف منى الشر ... خلاص براحتك .. انت بقى حر .. ..لسة عندى وش تانى .. متقدرش تشوفه فى ثوانى ..دة وش تلاقيه .. لو شفت منك شر.. بس بينى وبينك .. ده كان سر .. خفت تخاف منى .. وتفتكرنى عليك بتغر ****
